Saturday, 12 February 2011

اخيراً فارقنا؟؟

خلاص احنا فوقنا؟
خلاص اتعتقنا؟
ردمنا بايدينا
جحورنا وشقوقنا؟
رسمنا بايدينا
بداية طريقنا؟
حقيقى فرقنا؟
مفيش ظلم تانى؟
مفيش ضلمة تانى؟
مفيش ذل تانى؟
مفيش حد يسرق
تعبنا وعرقنا؟
مفيش محسوبية؟
مفيش أولوية؟
لابن الوزير
على القهوجية؟
مفيش حد يقدر
يغمّض عنيا؟
ويقطع ايديّا؟
ويضحك عليّا؟
وكل اما اصرّخ
واقوله اكتفيت
يزوّد عليا؟
يقولى انت لسة
ماشفتش قسيّة؟
ما تصبر شوية؟
مفيش حد تانى
يسوّد زمانى
ويقطع لسانى؟
ويطرش ودانى؟
مفيش ضربة تقدر
تشقّق حيطانى؟
تزلزل مكانى؟
وتشرخ بيبانى؟
مفيش خوف يزعزع
فقلبى امانى؟
مفيش ضهر متنى؟
من الذل محنى؟
عليكم هنجنى
يا اهل الفساد
مفيش حد تانى
يزايد علينا؟
ويمسح ماضينا؟
يبيعنا فمزاد؟
كسرنا الجماد؟
قتلنا الجراد؟
وراس العباد
هتطلع لفوق؟
هنبنى البلاد؟
ننول المراد؟
وبحر السواد
أخيراً يروق؟
اخيراَ فارقنا؟
اخيراً نطقنا؟
مفيش حد تانى 
هيقدر يسوقنا؟
مفيش سم تانى
يسمّم عروقنا؟
مفيش مستحيل؟
وآدينا الدليل
وليلنا الطويل
خلاص بيفارقنا؟
مادام انطلقنا
مادام احنا فوقنا
فاضل كام دقيقة
ويشرق شروقنا

2 comments:

Montana Master Of Love said...
This comment has been removed by the author.
Montana Master Of Love said...

يارب يحفظ مصر يا اجمل الخطابات
و يارب دايما نتكلم وننطق ومنسكتش ع الغلط و يدوم الحب حوالينا

There was an error in this gadget