Tuesday 22 February 2011

مرثية

لا تأسفى
ما عاد يجدى الاعتذار  
فلقد افقت من الدوار
ادركت ان الحبُ شىء ٌوانتهى
ليله اذا جاءَ النهار
لا تعزفى
حبك على وترٌ من الأوتار
لا تخلقى لتجاهُلك أعذار
فالحب قد فاقَ المدى
حتى غدا
شيخ اتاهُ الاحتضار
سهم اصابه انكسار
بحر وشقهُ انشطار
أو تعلمين؟
حبك دمار
  • ~ ~

أى انتحار
ان تستميت بمعركة
دونَ انتصار
ويكونَ بركان الهوى
بركان خامد وانطوى
دون انفجار
أبحرتُ فى بحرِ الدموع
بلا قلوع
بلا رجوع
بلا اعتبارٍ للدوار
وغرستُ حبك فى الضلوع
ولم اجد
أيّة ربوع  ولم اجد
ايّة ثمار
أن انتظر حبك كمن يستنظرَ
أن تنبضَ الصحراءَ بالانهار
أو ترتوى بسلاسل الامطار
أن انتظر حبك كمن يستشعرَ
الشمس ناعمة كما الاقمار
والدنيا خالية من الاخطار
أو تعلمين
لا تأسفى
ما عاد يجدى الاعتذار
ما عاد ينفعنا الحوار
فالحب ماضٍ وانتهى
ولقد قَتَلهُ الانتظار

Saturday 12 February 2011

اخيراً فارقنا؟؟

خلاص احنا فوقنا؟
خلاص اتعتقنا؟
ردمنا بايدينا
جحورنا وشقوقنا؟
رسمنا بايدينا
بداية طريقنا؟
حقيقى فرقنا؟
مفيش ظلم تانى؟
مفيش ضلمة تانى؟
مفيش ذل تانى؟
مفيش حد يسرق
تعبنا وعرقنا؟
مفيش محسوبية؟
مفيش أولوية؟
لابن الوزير
على القهوجية؟
مفيش حد يقدر
يغمّض عنيا؟
ويقطع ايديّا؟
ويضحك عليّا؟
وكل اما اصرّخ
واقوله اكتفيت
يزوّد عليا؟
يقولى انت لسة
ماشفتش قسيّة؟
ما تصبر شوية؟
مفيش حد تانى
يسوّد زمانى
ويقطع لسانى؟
ويطرش ودانى؟
مفيش ضربة تقدر
تشقّق حيطانى؟
تزلزل مكانى؟
وتشرخ بيبانى؟
مفيش خوف يزعزع
فقلبى امانى؟
مفيش ضهر متنى؟
من الذل محنى؟
عليكم هنجنى
يا اهل الفساد
مفيش حد تانى
يزايد علينا؟
ويمسح ماضينا؟
يبيعنا فمزاد؟
كسرنا الجماد؟
قتلنا الجراد؟
وراس العباد
هتطلع لفوق؟
هنبنى البلاد؟
ننول المراد؟
وبحر السواد
أخيراً يروق؟
اخيراَ فارقنا؟
اخيراً نطقنا؟
مفيش حد تانى 
هيقدر يسوقنا؟
مفيش سم تانى
يسمّم عروقنا؟
مفيش مستحيل؟
وآدينا الدليل
وليلنا الطويل
خلاص بيفارقنا؟
مادام انطلقنا
مادام احنا فوقنا
فاضل كام دقيقة
ويشرق شروقنا

Friday 11 February 2011

بيان الرئيس

يموت تُلتُمّية

ودة يقول هسيبكم

وافوض مكانى
...
يا عقرب.. يا حية

فبطل تنادى

وتصرخ ..حرية

يا شعبى العزيز



وقبل اما حتى

تجف الدموع

يقولك رجوع

يقولك خنوع

يقولك نطفى بايدينا الشموع

سيادة الرئيس

بحكم الجموع

بيانك خسيس



يقولك هلّجم

لسانكوا بلجام

يقولك هخدّر

جنابكو بكلام

وسوسى هيفضل

يخور فى العظام

ياريت لو تقولوا

عليكوا السلام

ودم اللى ماتوا

هيطلع فطيس



يقوللك حكمت البلد تلاتينية

عزفت بدموعكوا على السمسمية

اغانى القسية

وقّلبتكوا فسبعين مليارية

وغرضى الوحيد فى الشهور اللى جاية

اقّفلها مية

...

..

فاكرها تكية

ومالهاش وريث



سيادة الرئيس

ياريت بس تسمح

تبطل تطلع لشعبك لسانك

ياريت بس تسمح

تبطل تجعجع...تبطل كلامك

شبابنا عفية

قوية وأبية

وكام مليونية

هتفضل تقوللك

توقّف بيانك

وتعزل ديوانك

وتسقط نظامك

وترحل يا تيس
 
 

Wednesday 9 February 2011

فاترينا

انا لا زعلان
ولا انا تعبان
ولا انا مدبوح بسكّينة
لكن مخنوق من العيشة
كما المانيكان فى فاترينا
!!
لانا عارف اتكلم
ولا عارف اتألم
ولا قادر اتعلم
مالدنيا لو كلمة
جوايا تتلملم
وتموّت الضلمة
مع ان انا اساسا
حدوتّى تدوينة
!! 
الكلمة مكتومة
فى ضلوعى وجعانى
مخنوقة مش عارفة
تطلع على لسانى
عصفورة محبوسة
جوايا وحزينة
!!
مش عارف انطقها
رغم ان انا شايفها
مرسومة فى عنيا
ممزوجة بدموعى
وبتحكى حكاوينا
مش عارف اكتبها
مع انها حروفها 
بيزغزغوا اديّا
ولا احلى باليرينا
مش عارف اوصفها
مع ان اطيافها
متشافة حواليا
وبتتخلق بينا
 !!
ومراكبى مش ماشية
واقفة الحياة بيا
مع ان تجديفها
مش مستحيل ليا
والدنيا مش ملكى
الفرحة مش ليا
مع ان تفاصيلها
متفصلة عليا
اكمنى" مانيكانة
للعرض والزينة
 !!
مكتوب عليا اثبت
العين ما تتحركش
الضحكة فشفايفى
والقلب مابيضحكش
الدنيا انا شايفها
من برة حيطة ازاز
والفرحة لها عفاريت
تسكن قلوب الناس
وفقلبى انا ما تسكنش
مهو اصل انا مجرد
مانيكان فى فاترينا
 !!
يا خوفى لا فمرة
همى يدشدشنى
ولا الاقى لو ضحكة
تحايلنى تناغشنى
يمكن تجمعنى
ولا الاقى شىء يعنى
يقدر يرجعنى
لمكانى من تانى
من جوة فاترينا
ونموت انا وقلبى
ولا شىء يعزينا