Monday 30 August 2010

خطابات جاهينية الطابع


لو عفريت اتربصلك

وفوسط العتمة قعدلك

اقرب شباك يقابلك

افتحه على مصراعيه

عفريتك راح يتبدد

والنور يمنعه يتجدد

جوة القمقم هيمدد

دى وصفة سهلة يا بيه




☆:*´¨`*:..:*´¨`*:.☆




خفافيش فى الضلمة مستخبية

وفسقف طموحك مستنية

نور لمبة شجاعتك المنسية


واقدر عليهم بصرخة قوية




☆:*´¨`*:..:*´¨`*:.☆




لو حلمك يوم انهار ما تتدمرش

واذا يوم ضيعته ما تتكدرش

من تحت الانقاض هتطلع افكار جامدة ما بتهزرش

تبنيلك احلام خرسانة ماتتكسرش

وبتعبك تبقى حقيقة ثابتة ما تتغيرش

11 comments:

HaDeer .R said...

هههههههههههههههه لا لظيظه فعلا بس صغيره كنت عايزه منها كتييييييييير بس انا لسه عند رايى اول واحده كانت رهيــــــــــــــــــبه و النوع ده لايق عليكى اوى الاسلوب ده بتبدعى فيه اكتر واستمرى بقى :)

esraa_mokaidam said...

اصبرى على رزقك يا هدير انا كاتبة مالنوع دة ييجى تسعين واحدة
وبالنسبة بقى للون التانى دة فجارى العمل عليه بس مش عارفة هتعجبكم الفكرة ولا لاء

HaDeer .R said...

طيب نزليهم مستنيه ايه؟

esraa_mokaidam said...

بقول جااااااااااارى العمل عليهم يعنى لسة ما كملوش هى فكيرة كدة لسة بتلعب فدماغى لما اخلصها اكيد هنزلها

мαησηα said...

لو حلمك يوم انهار ما تتدمرش
واذا يوم ضيعته ما تكدرش
من تحت الانقاض هتطلع افكار جامدة ما بتهزرش
تبنيلك احلام خرسانة ماتتأثرش
وبتعبك تبقى حقيقة ثابتة ما تتأثرش

الله عليكى وحشتينى اوى يا روئااا

esraa_mokaidam said...

بجد؟؟؟؟؟
الله عليكى انتى وكل مرة بتعمليلى مفاجأة احلى ماللى قبلها
انا بحبك اوى يا منى

سَارةٌ said...

حلوووين اووي .. :)

التلاته احلى من بعض .. :)

كل سنه وانتي طيبه ..

ويكا said...

اولا
انا بجد عاجبنى جدا جدا جدا ، النيك نيم بتاع سوسته ده.
بجد خطيييير .

اما بالنسبه الخطابات الجهينية الطابع فبرضه عجبتنى .

انتى واضح انك سوسته فعلا ، بس مش اى كلام يعنى.

المدونه اول مره اجيها ، بس شكلها كده مش هتبقى اخر مره.

esraa_mokaidam said...

حَـبآيـۃْ.بـטּـدۉل

مبسوطة جدا انهم عجبوكى :)
وانتى طيبة

esraa_mokaidam said...

ويكا على فكرة سوستة دة علشان انا فعلا شبه السوستة بقفش على حجات غريبة جدا وبقفل دماغى فحجات اغرب وبفتحها برضه بس فى الحجات اللى تتفتح
يا ترى حضرتك فهمته كدة؟:D

بالنسبة للخطابات بقى انا بجد بجد بجد مبسوطة جدا انها عجبت ناس متعرفنيش معرفة شخصية وكمان مش متابعين للمدونة يعنى مش مجبرين يسيبو كومنت ولما يسيبوه يبقى عشان الكلام عجبهم فعلا
نورت مدونتى واتشرف بزيارتك ليها مرة تانية

MoHaMed AhMeD said...

هذا الأسلوب جميل وبيوصل للناس عامة تحياتى