Monday 9 August 2010

مولد


          


  وسط الزحمة تايهين
 ضاعوا ماهماش باينين
فى اللى اتعكزعلى غيره 
 شاف فيه نوره ودليله
وفى اللى باع ضميره
وخسر دنيا ودين
فى اللى بتجرى على ضناها
ماهو يستاهل شقاها 
فى اللى السّكينة سرقاهم
 بالمولد فرحانين
  فى ناس متوحدين 
 وناس موحدين
 وناس متعنطزين
ع السٌلم رقاصين
 فى عالم منفوخين 
 من جواهم فاضيين
 فى عيال عمالة تلعب 
 ومزقططين هايصين
 فى ناس نايمين  
وناس صاحيين
 وناس عايشين
 ومش عايشين
فى ناس قادرين 
وناس مساكين
 وناس تعابين
وناس ضايعين
 فى ناس ضالين 
 فى ضلاليين
 فى مرتاحين
فى شقيانين
 مولد والساقية دايرة
 ايه الحكمة؟؟
  مش فاهمين
 امتى هاينفض طيب؟
اهو دة اللى مش عارفين

12 comments:

Esraa El Banna said...

رووووووووعة يا سوستة جداااااا
عجبانى جدا جدا

عارفة فكرتينى ب علي سلامة و شاعر تانى لسه تحت النشء كان له حاجة شبه كده جدااااااااا جدااا جدااا

بس بجد بتاعتك تححححححححفة روعة ما شاء الله عجبانى اوى

جوو اون يا جيرل عايزة اشوف المدونة بقت كتاب و هاخد نسخة من الطبعة الاولى و عليها امضا كمان ان شاء الله :(

مبروووووووووووك للمرة المليون يا سوستة



و من هنا عندى ارسل ليكى قبلة ع الجبين ;)
فهمانى انتى هاه ههههههههه

فاطمة اسامة said...

جميلة قوي يا سوستة استمر وابعتيلي دايما كل جديد

أختك
فاطمة اسامة

HaDeer .R said...

تحــــــــــــــــفه جداااااااا يا سوسو استمرييييييي كنتى مخبيه ده كله فين يا بت

esraa_mokaidam said...

اسراء بطلى تنفخينى وانا هاجى ايه يعننى جنب على سلامة ؟؟؟
والشاعر اللى تحت النشء لايمينى على اسمه بقى عشان اقراله
ومبسوطة انا انها عجبتك
والقبلة على الجبين مش ليا انا شوفى انتى ناوية تبعتيها لمين


ابتسامة خبيثة

esraa_mokaidam said...

فاطمة عرفاكى طبعا من غير ما تقولى اسمك وكويس انى لقيتك هنا

نورتى البلوج بتاعتى

esraa_mokaidam said...

هدير وحياتك انتى ما اعرف هو طلع لوحده لما ربنا اذنله يطلع

بس هو مش تحفة اوى .....لما قريتها استبوختها واترددت انى انزلها بس رجعت قلت هتقروا يعنى هتقروا

Esraa El Banna said...

مش بنفخك يا بت و لا حاجة
.. مع انك محتاجة لنفخ بدل ما انتى شبه زعزوعة القصب ههههههههههههههه :P :P

انا بقول الحقيقة و لا شئ سواها .. بجد عجبانى .. الله .. انتى مالك عجبتنى هههههههههههه

الشاعراللى تحت النشء منا لو فاكرة اسمه كنت قلت :(

يخرب بيت القبلة اللى ع الجبين ع القصيدة كلها يا شيخة ههههههههههههههه
اموت انا و اعرف مدايقاكى فى ايه

мαησηα said...

مولد والساقية دايرة
ايه الحكمة؟؟
مش فاهمين
امتى هاينفض طيب؟
اهو دة اللى مش عارفين


هايلة يا سوستة بجد

تسلم ايدك لخصتى الحياة ف كلمتين

وع رايك يا بنتى والله الواحد مش عارف امتى هينفض المولد

سلم اياديكى يا حبى

yomna adel mahmoud said...

فىناس نايمين
وناس صاحيين
وناس عايشين ومش عايشين

طبعا انتى عرفتى رأيى من اول ما اتكتبت وقلتلك انها وهميه بس فى حاجة مقلتهاش
عارفه الكلمتين الى فوق دول من كام يوم كده والله العظيم كانوا فدماغى اوى بس انتى عارفه اختك بتقرا بالعافيه اثاثا :D
فبجد فرحت اوى اوى اوى انككتبتيهم من نفسك حسيت انك فعلا توأمى وعارفه اللى فى دماغى ..حسيت اننا بنفكر بعقل واحد <3 بحبك يا سوسته

ملحوظه :انا هفضحك يا سوسته .....البت اسراء يا جماعه بتتكسف اوى تورى ماما اللى هى بتكتبه وانا اللى بوريه لماما شوفتوا الهبله

Esraa El Banna said...

على فكرة انا كمان كده و الله يا يمنى مش بورى لماما حاجة و خصوصا لو رومانسية :$

ههههههههههههه
و قافلة ع كل الحاجات اللى بكتبها بالمفتاح يااما عندى ع اللاب و ليها باسورد .. احتياطات امنية :))

ربنا يخليكم لبعض :)

Anonymous said...

روعه يا سوسو
استمري بقي عايزين كل كام يوم حاجه حلوه كده و عقبال متبقي كتاب يا رب

semsema said...

سوسو انا اللي كاتبه التعليق اللي فوق بس هو مش كتب اسمي وااااااااااااااءءءء هههههههههههههههه